×

ذكريات أسير في معتقل الخيام :برسم من يدافع عن عملاء اسرائيل

ذكريات أسير في معتقل الخيام :برسم من يدافع عن عملاء اسرائيل

Spread the love

كتب الاسير المحرر جلال شريم – مقالات مختارة
صعبة تعرفوا شو يعني معتقل الخيام
صعبة تفهموا احساس شخص معزول عن العالم ومحروم من ابسط الأمور الحياتية
صعبة تعرفوا شعور الجوع والعطش
صعبة تفهموا مشاعر شخص نازل فوق جسمو كل أنواع التعذيب من كهربا وجلد بالكرباج وكب سطل مي متلج وبعدو مباشرة سطل مي عم يغلي مع سلك كهربا موصول الى أماكن حساسة بجسم هذا « الانسان » يللي صفتو معتقل وهو عاري من تيابو وكمان تمت تعريته من كل صفاتو الانسانية.. وما تحاولوا تتخيلوا شعور هالشخص  » العاري » وهو معلق ع العمود تحت المطر والريح القاتلة متلجة وموصوفة بهيديك التلة العالية… صعبة يفهموا انو من هيك سقط كتير شهدا من هذا الإجرام
صعبة انقل شعور جوعان شاف كسرة خبز زغيرة فبلعها من دون تركيز ..طلعت بقايا صابونة
صعبة يفهموا شعور عطشان اضطر يشرب من بولو… صعبة يفهموا شعور جوعان اكل مشاية اسفنج
صعبة يفهموا كيف ست او سبع اشخاص بيقضوا ايامهم بغرفة مترين بمترين وحمامهم دلو بلاستيك
صعبة يفهموا شعور مشتاق ياكل تفاحة…بس وقعت منو بسطل الخ…. فشالها وغسلها ورجع أكلها
صعبة يفهموا شعور شخص لازم يعيش كل نهار على بيضة مسلوقة ونص رغيف خبز
صعبة يفهموا شعور ست أشخاص بزنزانة لازم يعيشوا على علبة سردين… كلهم
صعبة يفهموا كيف بدك تتحمم بتلات دقايق ..بدك تظهر من زنزانتك حتى الحمام الخارجي وتمشي بالطقس البارد حتى تغسل جسمك بمي باردة اذا ما لحقت شوية مي فاترة وترجع ع غرفتك بزمن قياسي… واذا نزلت منك نقطة مي بالكوريدور بدك تلمها بلسانك عن الأرض
صعبة يفهموا شعور ليلة السبت لما كان السجان يحضر برنامج المصارعة الحرة..وبعدها يختار كم شب عشوائيا ويصير يجرب الحركات يللي شافها بالبرنامج عليهم
صعبة يفهموا كيف ممكن شخص طولو مترين بدو ينحشر بزنزانة عرضها نص متر وارتفاعها تسعين سنم .. كان اسمها « القن
صعبة يفهموا كيف كانوا المعتقلين يناموا بالباحة تحت الشتي وحلمهم يفنوا شبابهم حتى يصيروا زهرة وطن يكبر وينتصر ويحضنهم.. مش يحضن جلادهم
كانوا ازهار ونازل فوقها الشتي لتعطينا امل بولادة وطن.. مش مزرعة
صعبة تفهموا شعورهم لما يشوفوا جلادهم عم يحضنوا هذا الوطن… حلكن تفهموا مدى الغبن والإحباط
فيقوا قبل قوات الاوان.. اذا بعد فيه مجال؟؟؟

Laisser un commentaire

francais - anglais ..